Lejletul Kadër

Bismil-lahir-Rahmanir-Rahim

Falënderimi i takon All-llahut. Atë e falënderojmë dhe prej Tij falje dhe ndihmë kërkojmë. Kërkojmë mbrojtje nga All-llahu prej të këqijave të vetvetes dhe të veprave tona. Kë e udhëzon All-llahu s'ka kush e lajthit dhe kë e largon nga rruga e vërtetë, s'ka kush e udhëzon. Dëshmoj se s'ka hyjni tjetër përveç Allahut,i Cili është Një dhe dëshmoj se Muhammedi është rob dhe i dërguar i Tij.

"O ju që keni besuar,keni frikë All-llahun me një frikë të denjë dhe mos vdisni,pos duke qenë muslimanë!"
[Ali Imran: 102]

Transmetohet se Aisheja [radijAllahu anha] ka thënë:

"Kur vinte dhjetëshja (dhjetë ditët e fundit të Ramazanit)i Dërguari i All-llahut [SalAllahu Alejhi ve Selem] e gjallëronte natën (me ibadet), e zgjonte familjen e tij, angazhohej më tepër dhe vetmohej (për ibadet dhe izolim prej grave)." [Muttefekun alejhi]
Rijadus-Salihin vol.1 hadithi nr.71

Aisheja [radijAllahu anha] thotë:

"Pejgamberi [SalAllahu Alejhi ve Selem] nuk falte në Ramazan apo jashtë tij më shumë se njëmbëdhjetë rekate. I falte katër rekate, e mos pyet për bukurinë dhe gjatësinë e tyre! Pastaj prap i falte katër rekate, e mos pyet për bukurinë dhe gjatësinë e tyre! Pastaj i falte tre rekate. Unë i thashë: " O i Dërguari i All-llahut, a flen ti para se ta falësh namazin e vitrit?" Pejgamberi [SalAllahu Alejhi ve Selem] u përgjigj: "Oj Aishe, sytë e mi flenë, por nuk flen zemra ime!" [Muttefekun alejhi]
Rijadus-Salihin vol.1 hadithi nr.636

Aisheja [radijAllahu anha] thotë se Pejgamberi [SalAllahu Alejhi ve Selem] në dhjetë ditët e fundit të Ramazanit bënte itikaf në xhami (mbyllej në të) dhe thoshte:

"Lypeni natën e Kadrit në dhjetë ditët e fundit të Ramazanit." [Muttefekun alejhi]
Rijadus-Salihin vol.1 hadithi nr.643

Na ka treguar Kutejbe b.Se´idi, këtij Ismail b.Xhaferi, këtij Humejdi, këtij Enesi, e këtë e kishte njoftuar Ubade b.Samiti se:

" Pejgamberi [SalAllahu Alejhi ve Selem] ka dalë t´i njoftojë sahabët për Natën e Kadrit (Lejletu-l-Kadr), kur atje grindeshin dy muslimanë. Për këtë shkak Pejgamberi [SalAllahu Alejhi ve Selem] ka thënë: ´ Kam dalur t´ju njoftoj për Natën e Kadrit, e pasiqë grindeshin filani e filani, ajo është grindur. Ndoshta kjo do të jetë më mirë për ju. Tashmë kërkojeni ju atë (Natën e Kadrit) në të shtatën, në të nëntën ose në të pestën (pas natës së njëzetë të Ramazanit)´."
Sahihul Buhari vol. 8 hadithi nr.49

Aisheja [radijAllahu anha] thotë:

"Pejgamberi [SalAllahu Alejhi ve Selem] bënte ibadet (nuk flente) gjatë muajit të Ramazanit, atë që nuk e bënte ditëve të tjera dhe muajve të tjerë. Ndërsa në dhjetë ditët e fundit bënte ibadet më shumë se ditëve të tjera". [Muslimi]
Rijadus-Salihin vol.1 hadithi nr.644

Aisheja [radijAllahu anha] thotë:

"Kur vinin dhjetë ditët e fundit të Ramazanit, i Dërguari i All-llahut bënte ibadet natën dhe e çonte familjen e vet që të bëjnë ibadet, ndërsa dyshekun e vet me gjithë mbulojë e palonte." [Muttefekun alejhi]
Rijadus-Salihin vol.1 hadithi nr.664

Ibnu Abbasi [radijAllahu anhuma] thotë se i Dërguari i All-llahut [SalAllahu Alejhi ve Selem] ka thënë:

"Nuk ka ditë, në të cilën veprat e mira janë më të dashura te All-llahu se sa këto ditë. Ato janë: dhjetë ditët e muajit Dhul Hixh-xhe."
Rijadus-Salihin vol.1 hadithi nr.677

Ibnu Umeri [radijAllahu anhuma] thotë:

"I Dërguari i All-llahut bënte itikaf në dhjetë ditët e fundit të muajit Ramazan." [Muttefekun alejhi]
Rijadus-Salihin vol.1 hadithi nr.690

Aisheja [radijAllahu anha] thotë se Pejgamberi [SalAllahu Alejhi ve Selem] bënte itikaf në dhjetë ditët e fundit të muajit Ramazan, derisa ndërroi jetë, pastaj bënin itikaf gratë e tij pas vdekjes së tij [SalAllahu Alejhi ve Selem]. [Muttefekun alejhi]
Rijadus-Salihin vol.1 hadithi nr.691

Muharem ibn Shaban ibn Fazliu

Kur´an dhe Sunnet