Perdorimi i armeve neper dasma

Opinioni i radhës me temen "Përdorimi i armëve në dasma, tmerr" nga DR.SHEFQET KRASNIQI mund ta lexoni në:

PËRDORIMI I ARMËVE NË DASMA, TMERR


Mendoj se këtë dukuri duhet luftuar të gjithë së bashku, duhet vetëdijesuar shoqërinë për rrezikun e madh që ka përdorimi I armëve, në veçanti në dasma, ku ka prani të madhe të njerëzve


Të dielen e kaluar isha për vizitë te disa të afërm. Pasi falëm iqindinë së bashku në xhami, filluan të më rrëfejnë se si kishin kaluar një natë mjaft të vështirë nga krismat e mëdha të një dasme aty afër tyre diku, e pastaj u ndala e mendova: subhanallah, a mendojnë ata njerëz se me përdorimin e armëve rrezikojnë jetët e qytetarëve?! Çfarë I nxit ata njerëz të përdorin armë në dasma, ku është ajo urtësi a mençuri?! Apo mos vallë është mendjemadhësi dhe kryelartësi, dhe para kësaj, dhe asaj, është një mashtrim I shejtanit të mallkuar, i ua zbukuron njerëzve përdorimin e armëve dhe qitjen me to, ndoshta mos rastësishtpo ia qëllon kush kujt e po e lë të vdekur. Zaten këtë e do shejtani, që të vriten njerëzit e pafajshëm! Për këtë arsye Pejgamberi a.s duke na e treguar rrezikun që ka përdorimi I armës dhe kujdesin e madh që ka shejtani për të derdhur gjak, thotë: “Mos t`ia drejtojë askush askujt hekurin (armën) qoftë edhe vëllai i tij nga nëna dhe baba, sepse të atillin e mallkojnë melaqet e Allahut”. E mallkojnë, si jo, ngaqë ai me vetëdije apo pa të ia rrezikon jetën tjetrit, duke qeshur, duke bërë shaka. Dhe më e keqja se e tërë kjo, është kur gjejmë të atillë që përdorin armë në dasma për herë të parë, që nuk kanë fare përvojë në përdorimin e tyre. Të tillët mund të vrasin ndokënd, siç ka ndodhur shumë herë në dasma. E nëse ndodhë një gjë e tillë, kush kënd ta fajësojë?! Gjaku u derdh, njeriu vdiq, kush ta paguajë atë gjak?! Kush do të japë llogari nesër para Allahut për të?! Mendoj se fajin kryesor e ka përdoruesi I armës, por pjesë të madhe të fajit ka edhe ftuesi i dasmës, i cili i lejon damorët të bëjnë një gjë të tillë. Aspak s`duhet shfajësuar organet e sigurimit, të cilat tolerojnë një gjë të tillë, edhe pse janë në dijeni. Ato kanë obligim fetar, ligjor e moral që të ndërhyjnë në ato raste, t`i arrestojnë ata persona, t`ua konfiskojnë armatimin dhe t`i qesin para drejtësisë, sepse koha e përdorimit të armëve ka kaluar. Kur ka qenë koha për t`i përdorur armët s`i ka ndalë Blaca e as Morina, e tash, kinse kamë armë unë dhe po qes me të!

Mendoj se këtë dukuri duhet luftuar të gjithë së bashku, duhet vetëdijesuar shoqërinë për rrezikun e madh që ka përdorimi I armëve, në veçanti në dasma, ku ka prani të madhe të njerëzve, sepse jeta e njeriut është shumë e shtrenjtë dhe se ajo vetëm një herë ka lulëzuar, nuk lulëzon për së dyti. Allahu e drejtoftë këtë shoqëri e në veçanti këtë rini, se vetem Ai është që mund t`i drejtojë e t`i sjellë në rrugën e Vet. Deri në javën e ardhshme me një temë të re. Selam alejkum ve rahmetullah!



Epoka e Re – e premte 24 korrik 2009
Dr.Shefqet Krasniqi